Edisaun Anteriór

B&F Acoustic hanesan duo timoroan ida ne’ebé hahú sira nia viajen muzikál iha tinan 2021, interpreta klásiku portugés no brazileiru sira. Ho identidade lian ne’ebé úniku, sira evolui ba kompozisaun orijinál no lansa ona muzika rasik lima. Sira nia múzika emblemátiku liu, “Paisagem Furak”, halibur ona ema ne’ebe hare liu rihun ba rihun iha YouTube, hodi hametin sira nia fatin iha múzika Timor-Leste nian.

Bepi hanesan artista timoroan ida ne’ebé halo atuasaun mesak ho estilu ne’ebé foka liu ba múzika Pop kontemporánea. Nia hahú nia kareira múzika iha 2019, no nia múzika sira ne’ebé popular liu maka “Hau ho O” no “La Imajina”, ho ema ne’ebe hare liu rihun sanulu resin iha YouTube.

Calema mak duo ida hosi São Tomé no Prínsipe ne’ebé hetan fama internasionál tanba sira nia múzika no lifuan ne’ebé mak hato’o mensajen sira domin dezde 2014. Sira nia muzika hetan ona ema ne’ebe hare liu millaun atus resin iha YouTube, no vídeo múzika ida, “Amar pela Metade,” filma no produz iha Timor-Leste. Calema halo ona atuasaun iha palku sira ne’ebé famosu liu iha mundu, inklui O2 Arena iha Londres no Accor Arena iha Paris. Iha 2025, sira iha digresaun ambisiozu ida ba estádiu ne’ebé mak sei hahú iha Estádio da Luz iha Lisboa.

Cidalia nu’udar artista timoroan ida ne’ebé koñesidu liu, ho kareira kle’an iha múzika romántiku. Ninia múzika “Hein” no “Ba De’it O” mak toka barak liu iha festa sira iha Timor-Leste laran tomak, ho ema ne’ebe hare liu rihun atus resin iha YouTube.

Cocoustic Band hanesan boyband timoroan ida ne’ebé harii iha tinan 2017, foka liu ba múzika orijinál ho estilu Pop alternativu ne’ebé reflete moris loroloron nian. Sira nia múzika ne’ebé koñesidu liu, “Misterio Domin” no “Hein”, hetan ona ema ne’ebe hare liu rihun atus resin iha YouTube.

Criimson nu’udar kantór no autor timoroan ne’ebé dedikadu no apaixonadu ho kareira mezak tinan rua ne’ebé fahe entre Timor-Leste no Reinu Unidu. Nia muzika sira “Hau no Ita” no “Tquila” sai hanesan ninia susesu boot liu, ne’ebe ema hare ona liu millaun resin iha YouTube.

DJ António Sampaio, hanesan DJ Português no halo múzika sai nia pasatempu favoritu. Ho repertóriu ne’ebé luan no variadu, nia kombina ritmu eletróniku atuál no modernu sira ho múzika rock no pop klásiku hosi dékada sira liubá, ne’ebé mak sai hanesan nia karakterístika hodi define.

DJ Dito nu’udar joven talentu timoroan ida ne’ebé halo pasu dahuluk iha múzika foin lalais ne’e, maibé manán daudaun ona públiku ho konjuntu sira ne’ebé enerjétiku no kontajiozu.

DJ Dora nu’udar artista joven timoroan ho paixaun kle’an ba múzika, ne’ebé hahú ninia kareira DJ iha tinan 2019. Ninia set sira kahur tipu dinámiku husi jéneru balun, inklui Afro, Moombahton no R&B.

Família Alcatraz hanesan banda rock timoroan ida ne’ebé harii iha tinan 1996, ho esénsia úniku ne’ebé dada ema barak ba sira nia konsertu. Sira nia single ne’ebé famozu liu mak “Tendénsia” no “Arkuiris”, ne’ebé hetan ona ema mak hare liu millaun resin iha YouTube.

Juju & Friends mak boyband timoroan ida ne’ebé harii iha tinan 2017, liuliu foka ba múzika Pop, kahur cover sira ho kompozisaun orijinál. Sira nia lian úniku aumenta liuhosi uza saxofone, fó ba sira toque distintivu ida. Sira nia múzika ne’ebé popular liu, “Kuidadu Nia” no “Hau Silensiu”, hetan ona ema mak hare liu rihun atus resin iha YouTube.